Ὁ Ποροσιένκο ἐν τῷ Οὐασιγκτόνι, ἀρχαιρεσίαι ἐν τῇ Σκωτίᾳ καὶ Ἀμερικανὸς πολίτης ἐν τῇ Κορέᾳ

Ὁ Ποροσιένκο τῇ τῶν ΗΑΠ βουλῇ προσαγορεύει

Φωτογραφίας ἔχομεν αἳ πλείονος ἀξιοῦνται ἢ χιλίων λόγοων, ἐνθάδε δὲ ἔχομεν φωτογραφίαν τινὰ ἐν ᾗ ἰδεῖν δυνάμεθα τὸν Ποροσιένκο, τὸν τῆς Οὐκραίνας πρόεδρον, τῇ τῶν ΗΑΠ βουλῇ προσαγορεύοντα· ὀλίγοις δὴ ἔξεστι τοῦτο ποιεῖν, ἡ γὰρ Ἀμερικανὴ

ἀρχὴ τοῦτο συγχωρεῖ μόνον ὀλίγοις τισίν, τούτοις οὓς πιστοὺς συμμάχους εἶναι νομίζει. παρὰ μὲν τῆς τῶν ΗΑΠ βουλῆς ᾔτησεν ὁ Ποροσιένκο ὅπλα τῷ τῆς Οὐκραίνας στρατεύματι, ὁ δὲ Ὀβάμα ὅπλα μὲν πορῖσαι οὐκ ἐθέλει (νομίζει γὰρ τοῦτο τὴν τάσιν αὐξάνειν ἄν), βούλεται δὲ μόνον χρήματα πορίζειν· ταῦτα δὲ ἀκούσας ἀπεκρίνατο ὁ Ποροσιένκο ὅτι οὐκ ἐξείη οὐδενὶ ἐν τῷ πολέμῳ νικᾶν μόνον σῖτόν τε καὶ φάρμακα δεχομένῳ.

ἐν δὲ τῇ Σκωτίᾳ ἀρχαιρεσίας ἐποιήσαντο οἱ πολῖται, ἐδέησε γὰρ αὐτοὺς ψηφίζεσθαι πότερον βούλοιντο ἐν τῷ Ἡνωμένῳ Βασιλείῳ διαμένειν ἢ αὐτονόμους γενέσθαι, ἐνίκησαν δὲ οἱ ἐν τῷ Ἡνωμένῳ Βασιλείῳ διαμένειν βουλόμενοι, πλεῖον γὰρ τοῦ τῶν ψήφων ἡμίσεος ἐκτήσαντο. τοῦ ἀποβαίνοντος ἀγγελθέντος, ὁ Ἀλεξάνδρος Σάλμονδ τῷ μὲν Δαβὶδ Κάμερον ἐπὶ τῇ νίκῃ συνήσθη, τῆς δὲ ἀρχῆς ἑκὼν ἐξέστη.

ἐν δὲ Νοτίᾳ Κορέᾳ οἱ φύλακες Ἀμερικανὸν πολίτην κατέσχον ἅτε πρὸς τὴν Βορεαίαν Κορέαν διελθεῖν πειρώμενον... νέοντα. ὁ ἄνθρωπος, ἴσως εἴκοσι καὶ πέντε ἔτη γεγονώς (οἱ φύλακες τοῦτο λέγουσιν), τοὺς μὲν φρουροὺς ἔλαθε πρὸς τὸν ποταμὸν Ἃν κρύφα προσβαίνων (οὗτος ὁ ποταμός, χιλιόμετρα ὢν τὸ εὖρος, ὅρος ἐστὶ μεταξὺ τοῖν δυοῖν Κορέαιν), παρὰ δὲ τῷ ποταμῷ ἀφικόμενος νέων ἤρξατο, ὅμως δὲ ἤδη ἐν τῷ ὕδατι ὢν ναῦν τῆς Νοτίας Κορέας τινὰ οὐκ ἔλαθεν. ὁ ἄνθρωπος, καταληφθείς, εἶπεν ὅτι ἐν νῷ ἔχοι τῷ τῆς Νοτίας Κορέας ἄρχοντι διαλέγεσθαι.

http://www.akwn.net/