Ὁ Ὀβάμα νέον νόμον προτίθησιν

Τοὺς νέους περὶ τῶν τε μεταναστῶν καὶ τῆς Κούβης νόμους νεωστὶ καταθείς, ἔχει νῦν ἐν νῷ ὁ πρόεδρος Ὀβάμα νέον ἄλλον νόμον, περὶ τῶν φόρων νῦν, τῇ Βουλῇ προθεῖναι. τὸ τοῦ προέδρου βούλευμα τόδε ἐστίν, τοὺς μὲν φόρους αὐξάνειν τούτοις τοῖς πολίταις οἵτινες ἂν πλεῖον ἢ 500,000 δολάρια κατ' ἐνιαυτὸν δέξωνται, τὴν δε μέσην τάξιν τῶν πολιτῶν ὠφελεῖν. ὅμως δὲ μεμνῆσθαι δεῖ ὅτι οἱ μὲν
ῥεπουβλικανοὶ τυγχάνουσι τὴν Βουλὴν κατέχοντες, τούτων δὲ οὕτως ἐχόντων οἱ βουλευταὶ εἰκότως τὸν νέον νόμον οὐ δέξονται. ἴσως εἰ ὁ τοῦτον τὸν νέον νόμον προτιθεὶς ῥεπουβλικανὸς εἴη, τότε ἡ Βουλὴ δέξαιτο ἄν;

κατὰ τὸν πρόεδρον Ὀβάμα, ἡ μέση τάξις τῶν πολιτῶν οὐδένα λανθάνει, καίπερ τῆς Ἀμερικανῆς οἰκονομίας ἤδη ἀναλαμβανούσης, ταύτης τῆς ἀναλήψεως οὐκέτι αἰσθανομένη, τοῦτο δέ ἐστιν ὃ μεταβαλεῖν πειρᾶται ὁ πρόεδρος. ἡ μὲν ἀνεργία μειοῦται, τοῦτο πάντες οἱ πολῖται ἴσασιν, οἱ δὲ τῆς μέσης τάξεως μισθοὶ οὐκ αὐξάνονται, πάντες δὲ οἱ ἔμπειροι ἴσασιν ὅτι δεῖ τοὺς ταύτης τῆς τάξεως μισθοὺς αὐξάνειν ἵνα ἡ οἰκονομία διορθῶται.

http://www.akwn.net/